Еўрасаюз узгадніў новыя санкцыі супраць Расіі, але адклаў іх на тыдзень
На рашэнне міністраў будуць уплываць вынікі перамоваў у Мінску ў сераду, 11 лютага.
Кіраўнікі МЗС краін Еўрасаюза ухвалілі санкцыі супраць Расіі. Пра гэта паведаміў кіраўнік МЗС Францыі Ларан Фабіус. Па яго словах, якія перадае РБК, ці набудуць моц гэтыя санкцыі, будзе разглядацца ў наступны панядзелак.
Кіраўнік французскай дыпламатыі адзначыў, што рашэнне будзе залежаць ад таго, як пройдзе запланаваная на 11 лютага ў Мінску сустрэча ў нармандскім фармаце — з удзелам кіраўнікоў Украіны Расіі, Нямеччыны і Францыі.
Як паведамлялася раней, у "чорны спіс" Еўрасаюза увойдуць яшчэ 19 грамадзян (у тым ліку пяць расіян) і дзевяць арганізацый (з іх адна расійская). Высокапастаўленых асоб, як інфармуе Reuters, сярод іх няма.
Фота — AP
