Дзве версіі бюджэту-2019: каму дадалі грошай на выдаткі?

Фота: Reuters
Фота: Reuters

У аўторак, 18 снежня, Палата прадстаўнікоў прыняла ў першым чытанні "выпраўлены і дапоўнены" закон аб бюджэце на 2019-ы год. Дакумент практычна не адрозніваецца ад першапачатковага варыянту, які з'явіўся ў адкрытым доступе 55 дзён таму, хоць за гэтыя амаль два месяцы адбылося многае. Нафта пачала расці ў цане, Лукашэнка на саміце ЕАЭС палаяўся з Пуціным, а расійскія фінансавыя ўлады вырашылі зрабіць выгляд, што і не абяцалі кампенсацыю за "падатковы манеўр", які, паводле ацэнак беларускага боку, у сярэднетэрміновай перспектыве будзе каштаваць беларускаму ж бюджэту 10 мільярдаў долараў.

Еўрарадыё паглядзела, каму дадалі грошай на выдаткі ў абноўленым бюджэце Беларусі на 2019-ы год, які сёння і заўтра, практычна не чытаючы, у двух чытаннях прымае парламент.

Нягледзячы на ​​непрыемныя навіны з Расіі, бюджэт застаецца прафіцытным. І мала таго: прафіцыт захоўваецца ў тым жа аб'ёме: каля 1,7 мільярда рублёў (1 701 873 765 рублёў). Даходы і выдаткі бюджэту цудоўным чынам выраслі (а не скараціліся, як можна было чакаць) на аднолькавую суму 161 779 300 рублёў.

Больш за ўсё павялічыліся выдаткі дарожнага фонду: адразу на 18 мільёнаў рублёў. Грошы павінны пайсці на "будаўніцтва і рэканструкцыю аўтамабільных дарог".

Арміі перападзе на 14,5 мільёна рублёў больш, на 2,4 мільёна рублёў больш атрымаюць дзеячы культуры і мастацтва.

Яшчэ амаль 17 мільёнаў рублёў дадаткова выдзелена паліўна-энергетычнаму комплексу. 800 тысяч рублёў дададзена органам Пракуратуры.

Каля 65 мільёнаў рублёў улады вырашылі дадаткова накіраваць на дзяржаўную інвестыцыйную праграму. Яшчэ 44 мільёны рублёў выдзеляць на міжбюджэтныя трансферы (для бюджэтаў іншых узроўняў).

А вось выдаткі на правядзенне выбараў і рэферэндумаў не змяніліся. У "нявыбарны" 2019 год Цэнтрвыбаркам будзе каштаваць беларусам 538 тысяч рублёў. Гэта не шмат — на правядзенне выбараў (або рэферэндуму) патрэбна нашмат больш. Але гэта, як мы ўжо ведаем, нічога не значыць.

Апошнія навіны

Галоўнае

Выбар рэдакцыі