У бюджэце-2024 улічылі маёмасць, канфіскаваную ў праціўнікаў Лукашэнкі
Мінск / Еўрарадыё
"Іншыя непадатковыя даходы" бюджэта Беларусі год вырастуць у 1,5 раза. З 595,5 млн рублёў (бюджэт-2023) да 994,5 млн рублёў (бюджэт-2024). Вось такі ва ўладаў план на наступны год.
Адкуль возьмецца гэты рост? У нас ёсць версія пра дзве крыніцы, і абедзьве нам не падабаюцца. Першая: сюды ўлічаныя "кампенсацыі", якія сілавічкі выбіваюць з беларусаў за данаты на карысць дэмсілаў. Другая: сюды пойдзе даход ад продажу канфіскаванай маёмасці апазіцыянераў.
Па некаторых такіх "спецвытворчасцях" ужо вынесеныя завочныя прысуды. Напрыклад, Аляксандра Апейкіна і Аляксандру Герасіменю "пакаралі" за іх дзейнасць у Беларускім фондзе спартыўнай салідарнасці і прысудзілі па 12 гадоў калоніі кожнаму. Самі абвінавачаныя на судзе не прысутнічалі, яны знаходзяцца за мяжой з восені 2020-га.
Іншыя справы яшчэ працягваюцца. Напрыклад, напачатку кастрычніка пачалі новую "спецвытворчасць" супраць экс-рэстаратара, а цяпер палітычнага эмігранта Вадзіма Пракоп'ева. Хаця ў чэрвені ў Мінску яго ўжо завочна прысудзілі да 25 гадоў калоніі ўзмоцненага рэжыму (па "справе аб падпале дома дэпутата Гайдукевіча", па якой праходзілі 18 чалавек).
