Дом Маты Хары згарэў у Нідэрландах
Буйны пажар здарыўся ў галандскім горадзе Леўвардэн: згарэла некалькі дамоў, у тым ліку той, дзе ў 1876 годзе нарадзілася легендарная шпіёнка.
Гэта адбылося ў суботу, 19 кастрычніка, перадае агенцтва Франс Прэс.
Маргарэта Гертруда Зэле была дачкой уладальніка крамы капелюшоў. У 18 гадоў яна выйшла замуж за 38-гадовага афіцэра, які служыў у Ост-Індыі, але шлюб не склаўся. Маргарэта прыехала ў Францыю без мужа і грошай, узяла сабе новае імя і стварыла вобраз экзатычнай танцоркі Маты Хары.
13 лютага 1917 года яе арыштавалі ў Парыжы па абвінавачанні ў шпіянажы. Суд над Матай Хары быў закрытым. Яе расстралялі 15 кастрычніка 1917 года. У музеі анатоміі доўгі час захоўвалася забальзамаваная галава легендарнай жанчыны, аднак у 2000 годзе яе скралі невядомыя.
