Ціханоўская возьме ўдзел у сустрэчах кіраўнікоў МЗС краін NATO і АБСЕ
![Святлана Ціханоўская / @tsikhanouskaya](/sites/default/files/styles/gallery_main/public/2023-08/%D0%B3%D0%BB%D0%B0%D0%B2%D0%BD%D0%B0%D1%8F_36.jpg.webp?itok=0DgkOSzy)
Святлана Ціханоўская / @tsikhanouskaya
Святлана Ціханоўская возьме ўдзел у сустрэчы кіраўнікоў знешнепалітычных ведамстваў краін NATO і АБСЕ, паведамляе @pozirkonline са спасылкай на дарадцу Ціханоўскай Франака Вячорку.
Саміт кіраўнікоў знешнепалітычных ведамстваў краін NATO пройдзе ў Бухарэсце (Румынія) 29-30 лістапада. Месца сустрэчы абрана такім чынам, каб прадэманстраваць падтрымку ўсходняму флангу NATO і Чарнаморскаму рэгіёну, піша Deutsche Welle. Гэтаму рэгіёну цяпер надаецца асаблівая ўвага праз расійскую агрэсію. Вайна, якую развязала Расія, успрымаецца як беспрэцэдэнтная пагроза, асабліва ва ўсходніх краінах NATO, краінах Балтыі і Польшчы. Гэтую сітуацыю міністры замежных спраў і маюць намер абмеркаваць на сустрэчы ў Бухарэсце.
Святлана Ціханоўская ўжо прыбыла ў сталіцу Румыніі. Пачаўся яе афіцыйны трохдзённы візіт у Бухарэст. У рамках гэтага візіту яна і прыме ўдзел у саміце кіраўнікоў знешнепалітычных ведамстваў краін NATO — яна запрошаная на сустрэчу, распавёў Вячорка.
1 снежня Ціханоўская выступіць на сустрэчы кіраўнікоў знешнепалітычных ведамстваў краін АБСЕ. Тут адбудзецца дыскусія па Беларусі, якую ініцыявалі ЗША і Эстонія. На саміце кіраўнікоў МЗС АБСЕ чакалі і беларускага міністра Уладзіміра Макея, але ў суботу ён раптоўна памёр.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.