Ці стане Беларусь для сусветнай грамадскасці такім самым агрэсарам, як Расія?
Беларусы ў Варшаве выступілі ў падтрымку Украіны / Еўрарадыё
Беларусь пакуль не стала ў грамадскай свядомасці такім самым агрэсарам, як Расія. І наўрад ці стане, лічыць прадстаўнік Офіса Святланы Ціханоўскай, эксперт па выбарах Аляксандр Шлык.
— У грамадскай свядомасці мы пакуль не такі самы агрэсар, як Расія. І я вельмі спадзяюся, што мы такім самым агрэсарам не станем. Я спадзяюся, што вайну нейкім чынам спыняць. Але я ўпэўнены, што, калі вайна будзе працягвацца, антываенныя настроі нікуды не сыдуць.
Шлык нагадвае, як важна не забываць пра ўзаемасувязі ў палітыцы. Трэба ўвесь час памятаць, што пытанні суверэнітэту, дэмакратыі і міру цесна звязаныя адно з адным. А для Беларусі цяпер востра стаіць праблема суверэнітэту.
— Мы не паводзім цяпер сябе як суверэнная дзяржава. Мы абслугоўваем інтарэсы іншай дзяржавы. Чаму чалавек, які называе сябе прэзідэнтам, гаворыць пра інтарэсы нейкай іншай краіны? Якая розніца, што будзе трэба Расіі? Самае важнае — што трэба нам. А нам гэтая вайна яўна не патрэбная.
Ён прыводзіць галоўны пастулат паліталогіі: дэмакратыі адна з адной не ваююць. Яны адна з адной гандлююць.
