Чэмпіён Беларусі брэсцкае "Дынама" развіталася з галоўным трэнерам

Футбольнае брэсцкае "Дынама" засталося без галоўнага трэнера. Кіраўніцтва клуба вырашыла не працягваць кантракт з чэшскім спецыялістам Марцэлам Лічкам. Менавіта пад яго кіраўніцтвам каманда з горада над Бугам упершыню стала чэмпіёнам Беларусі і перарвала працяглую гегемонію БАТЭ.

ФК "Дынама-Брэст" дзякуе Лічку за працу і жадае яму ўдачы ў далейшай кар'еры.

Марцэлу Лічку 42 гады. Ён быў футбалістам, трэнерскую кар'еру пачаў у 2013-м. У Чэхіі Лічка альбо трэніраваў малавядомыя каманды ў ніжэйшых лігах, альбо быў асістэнтам галоўнага трэнера. Менавіта ў якасці асістэнта трэнера брэсцкага "Дынама" Радаслава Латала Марцэла Лічку запрасілі зімой 2018 года. Галоўным трэнерам ён стаў у канцы мінулага года.

Нядаўна Лічка даў інтэрв'ю чэшскаму радыё, у якім расказаў пра рознагалоссі з кіраўніком клуба, які "не разумее футбол". Галоўнага трэнера брэсцкага "Дынама" не было на чэмпіёнскай вечарыне каманды.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.