Чатырох чыгуначнікаў у Брэсце злавілі на крадзяжы дызпаліва (відэа)
У Брэсце міліцыянты раскрылі злачынную схему, па якой на чыгунцы кралі дызельнае паліва, інфармуе прэс-служба УУС Брэсцкага аблвыканкама.
Праваахоўнікі затрымалі чатырох супрацоўнікаў Беларускай чыгункі: двух брастаўчан і двух мінчукоў. Зламыснікі кралі паліва з дызельных генератараў халадзільнага абсталявання вагонаў-рэфрыжэратараў. Падчас перавозкі прадукцыі яны знарок выключалі маразільнае абсталяванне, каб эканоміць паліва.
Перад затрыманнем чыгуначнікі паспелі загрузіць у асабістае аўто больш за 1,3 т дызпаліва на суму звыш 1,8 тысячы рублёў.
Следчы камітэт завёў на іх крымінальную справу за прысабечванне даручанай маёмасці групай асоб па папярэдняй змове. Зламыснікам пагражае да пяці гадоў пазбаўлення волі.
