Чаму беларусы марудзяць з прыватызацыяй?

У краіне дагэтуль засталося 8% непрыватызаванага жылля. Калі да 1 ліпеня 2016 года “ўладальнікі” гэтых кватэр нічога не зробяць, ім прыйдзецца плаціць за арэнду, жыллё пяройдзе ў статус камерцыйнага.

Ці сапраўды прыватызаваць больш выгадна, чым арэндаваць?

Жыхары дома 1980 года пабудовы ў аграгарадку Брэсцкай вобласці з прыватызацыяй не спяшаюцца. Схамянуліся толькі цяпер, і тое не ўсе.

“Калі раней была прыватызацыя, нам паставілі такую ўмову: або ўсе прыватызуйце, або ніхто. Мы ж не ведалі, што калісьці нас будзе чакаць арэндная плата, мы ж гэтага нічога не ведалі, таму ніхто і не прыватызаваў”, — распавядае пенсіянерка Галіна.

Для сваёй двухпакаёўкі плошчай каля 48 квадратных метраў гаспадыня ацэншчыкаў яшчэ не запрашала. Але даведалася, колькі каштуе прыватызацыя трохпакаёўкі ў тым жа доме:

“Пазваніла сваёй суседцы, яна гаворыць, што ўжо некалькі чалавек з нашага дома прыватызуюць кватэры. Ведаю, што трохпакаёвая кватэра каштуе 58 мільёнаў рублёў”.

Плата за прыватызацыю двухпакаёўкі — 108 тысяч за месяц, арэнда — 520

Вялікую суму трэба выплаціць толькі спачатку — 10% ад кошту. Астатняя разбіваецца на роўныя часткі, якія выплачваюцца цягам 40 гадоў. То бок, штомесяц за трохпакаёўку ў гэтым доме трэба будзе выдаткоўваць 108 750 рублёў. Прычым, гэтая сума не мяняецца, нягледзячы на інфляцыю або курс долара.

Гаспадыня двухпакаёвай кватэры пакуль не ведае, колькі будзе плаціць з 1 ліпеня за арэнду, калі не здзейсніць прыватызацыю. Высветліць гэта ў абаненцкім аддзеле ЖКГ таксама аказалася немагчыма — цяпер кошты пераглядаюць у сувязі з павышэннем базавай.

“Мы за студзень нічога не ведаем, а вы хочаце, каб ведалі за ліпень. На сёння цёмны лес навокал”.

Для прыкладу, у Смаргоні пры старой базавай, роўнай 180 000, арэнда двухпакаёўкі абыходзілася ў 520 000.