Брэсцкі журналіст памёр наўпрост на працоўным месцы

Сваю калонку палітычнага аглядальніка “Таймер” Міхаіл Янчук вёў бяззменна цягам 20 гадоў. Адзін з выпускаў прыслаў пасля інфаркту з палаты рэанімацыі мясцовай бальніцы.

Міхаілу Янчуку было 63 гады. У маладосці ён працаваў геолагам. Пакінуў чытачам несамавітую кнігу “камчацкіх апавяданняў” пра геолагаразведку “Я — “фирма-27”, выпушчаную са спрыяннем газеты “Брестский курьер”. Падрыхтаваў яшчэ тры кнігі апавяданняў, якія рэдакцыя ў некралогу паабяцала “выдаць як памяць”.

Развітанне з Міхаілам Янчуком у рэдакцыі газеты адбудзецца ў суботу, 13 ліпеня, а 11-й гадзіне. Пахаваюць яго ў вёсцы Сычы Брэсцкага раёна, дзе пахаваныя яго блізкія родзічы.