БХД не падтрымае на прэзідэнцкіх выбарах ніводнага з кандыдатаў
Бо няма адзінага прэтэндэнта ад дэмакратычных сіл.
Незарэгістраваная партыя “Беларуская хрысціянская дэмакратыя” на сёлетніх прэзідэнцкіх выбарах не будзе падтрымліваць нікога з кандыдатаў, а таксама не выставіць уласнага прэтэндэнта на пасаду кіраўніка краіны. Такое рашэнне прынялі дэлегаты ўстаноўчага з’езду партыі 13 чэрвеня ў Мінску.
Як адзначыў сустрашыня аргкамітэту БХД Павел Севярынец, для яго арганізацыі “кампанія, якую рыхтуюць Лукашэнка і Ярмошына, не выбарчая, а палітычная”. Таму партыя плануе ладзіць кампанію салідарнасці з Міколам Статкевічам і ўсімі іншымі палітвязнямі.
Яшчэ адзін сустаршыня Віталь Рымашэўскі сказаў, што партыя лічыць сваёй паразай тое, што апазіцыя не змагла дамовіцца пра адзінага кандыдата.
БХД будзе браць удзел у кампаніі назірання “Права выбару”, мэта якой — фіксацыя рэальнай яўкі выбаршчыкаў і выяўленне фактаў прымусу і фальсіфікацыяў.
Севярынец таксама заявіў, што БХД “рыхтуецца ўзяць у свае рукі ўладу”, хоць цяпер гэтага зрабіць не можа, паведамляе БелаПАН.