Беларусы прапусцяць чэмпіянат свету па боксе, хоць з баксёраў знялі санкцыі
Прычына — "часовыя матэрыяльна-тэхнічныя абмежаванні, звязаныя з падрыхтоўкай спартоўцаў" / pixabay
Міжнародная асацыяцыя бокса IBA атрымала афіцыйныя лісты ад нацыянальных федэрацый Расіі і Беларусі з адмовай сёлета выставіць сваіх спартоўцаў на моладзевы чэмпіянат свету.
У лістах гаварылася, што баксёры дзвюх краін, нягледзячы на магчымасць удзелу ўва ўсіх спаборніцтвах IBA, не прыедуць у 2022 годзе на чэмпіянат свету ў Іспанію.
"Прычына рашэння – часовыя і матэрыяльна-тэхнічныя абмежаванні, звязаныя з парыхтоўкай спартоўцаў", — паведамляе Міжнародная асацыяцыя бокса.
Раней за беларускіх і расійскіх спартоўцаў адхілялі ад спаборніцтваў пад эгідай IBA, аднак у гэтым месяцы рада дырэктароў асацыяцыя прагаласавала за скасаванне гэтай забароны.
"IBA павінна заставацца палітычна нейтральнай і незалежнай. IBA заклікае да міру і застаецца міратворцам у кожных канфліктах. Апроч таго, IBA абавязана забяспечыць роўны доступ спартоўцаў і афіцыйных асобаў да спаборніцтваў, незалежна ад іх нацыянальнасці і месца жыхарства", — гаварылася ў заяве.
І расійская, і беларуская каманды змаглі б выступіць пад сваімі сцягамі, а ў выпадку, калі б заваявалі залаты медаль, прагучалі б нацыянальныя гімны.
