Беларускія памежнікі не пусцілі польскага журналіста ў Маскву

Беларускія памежнікі не дазволілі праехаць з Варшавы ў Маскву карэспандэнту "Gazety Wyborczej" Вацлаву Радзівіновічу.
Пра гэта паведаміў карэспандэнт выдання ў Гродне Андрэй Пачобут. Паводле яго слоў, інцыдэнт адбыўся ўначы 16 ліпеня ў Брэсце.

Радзівіновіч з'яўляецца карэспандэнтам "Gazety Wyborczej" у Маскве, куды ён і накіроўваўся. У Брэсце беларускія памежнікі пасля праверкі дакументаў папрасілі яго пакінуць цягнік.

Да шостай гадзіны раніцы яго трымалі на мяжы пад аховай, пасля чаго пасадзілі ў цягнік, які рухаўся назад у Польшчу.

Пры гэтым Радзівіновічу не паставілі ў пашпарт ніякіх адзнак, якія б забаранялі ўезд у Беларусь, — яму толькі параілі або лятаць у Маскву самалётам, або ездзіць туды цераз Украіну.

Раней Радзівіновіч працаваў карэспандэнтам польскага выдання ў Беларусі. У верасні 2006 года ён не атрымаў акрэдытацыю беларускага МЗС і вымушаны быў пакінуць краіну.

Нагадаем таксама, што ў лютым 2006 года Радзівіновічу было адмоўлена ва ўездзе ў Беларусь, нягледзячы на наяўнасць усіх неабходных дакументаў.

У сувязі з гэтым інцыдэнтам МЗС Польшчы накіроўвала ноту на адрас беларускага знешнепалітычнага ведамства.

БелаПАН