Беларуская дзяржава выплаціць праваабаронцу 7500 рублёў

Беларуская дзяржава выплаціць праваабаронцу Андрэю Бандарэнку 7500 рублёў. Гэта кампенсацыя маёмаснай шкоды, якую нанёс яму сваімі неправамернымі дзеяннямі Магілёўскі міжраённы аддзел Следчага камітэта, інфармуе сайт platformabelarus.com.

Крымінальная справа ў дачыненні Бандарэнкі была распачатая восенню 2016 года па артыкуле "Злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі" (у той час праваабаронца адбываў тэрмін у шклоўскай калоніі). Аднак суд Ленінскага раёна Магілёва ў сакавіку 2017-га прызнаў яго невінаватым. Працэс кампенсацыі зацягнуўся на два гады. Нарэшце ў студзені сёлета суд Маскоўскага раёна сталіцы прыняў рашэнне на карысць Андрэя Бандарэнкі.

Бандарэнка — вядомы беларускі праваабаронца. З 2014-га ён адбываў пакаранне за "злоснае хуліганства". Па амністыі 4-гадовы тэрмін быў скарочаны да трох гадоў. І калі ён ужо заканчваўся, узнікла згаданая новая справа. На волю выйшаў у сакавіку 2017-га, зарэгістраваў Прыватную інфармацыйную ўстанову "Нью Платформ інавэйшн". Нядаўна Бандарэнка стаў дырэктарам "БелГазеты".

Больш важных і цікавых навінаў у праграме “Еўразум” за 30.01