Беларусь рыхтуецца да вайны? Меркаванне Шрайбмана

Пасля заяваў Лукашэнкі пра тое, што Беларусь рыхтуецца да вайны, зноў пачаліся размовы, што наша краіна можа зрабіцца паўнавартаснай удзельніцай ваеннай агрэсіі супраць NATO.

Як успрымаць выказванні Лукашэнкі і да чаго ўжо паўтара года рыхтуецца беларускае войска? На гэтыя пытанні ў эфіры BILD адказвае палітычны аналітык Арцём Шрайбман.

Паводле яго слоў, да такіх заяваў Лукашэнку трэба ставіцца вельмі сур'ёзна, а не ўспрымаць іх як танны блеф.

— Усе яго заявы цяпер гучаць як трыгер. Напрыклад, мы ўжо чуем пра размяшчэнне дадатковага нямецкага кантынгенту ў Літве, што можа справакаваць размяшчэнне новых расійскіх базаў у Беларусі. Мы памятаем, як яго жартаўлівая заява, што вагнераўцы "хочуць прагуляцца ў Польшчу" прымусіла сабрацца міністраў унутраных спраў чатырох краін (Польшчы, Літвы, Латвіі, Эстоніі) і ўзгадніць механізм закрыцця некаторых памежных пераходаў на мяжы з Беларуссю. Таму ўсе яго словы могуць рэальна прыводзіць да сур'ёзных палітычных наступстваў.

Пры гэтым Шрайбман сцвярджае, што сам Лукашэнка ў новай вайне не зацікаўлены, а ў выпадку прымусу будзе супраціўляцца і тлумачыць Пуціну, чаму гэта выйдзе бокам. Але калі ў Пуціна з'явіцца рэсурс і рэальнае жаданне ўцягнуць Беларусь у вайну, Лукашэнка не зможа гэтаму перашкодзіць, мяркуе аналітык.

Што тычыцца беларускага войска, то цяпер яно старанна трэніруецца, спрабуючы пераняць досвед як расійскага войска, так і вагнераўцаў.

— Акрамя гэтага, у войсках пачасціліся мабілізацыйныя мерапрыемствы. Я б сказаў, што Беларусь ужо паўтара года настройвае сябе на больш мяккае правядзенне мабілізацыі, калі яна спатрэбіцца: як у юрыдычным плане, так і ў практычным, — рэзюмуе Шрайбман.