Беларусь не бачыць небяспекі ў тым, што Літва знізіць прапускную здольнасць ЛЭП
У Літве лічаць БелАЭС небяспечнай / Itar-Tass / Scanpix
Рашэнне Літвы зменшыць прапускную здольнасць транспамежных ліній электраперадачы не паўплывае на энергасістэму Беларусі, запэўнівае Мінэнерга.
Літва неаднаразова заяўляла пра тое, што мае намер абмежаваць камерцыйныя пастаўкі электраэнергіі праз транпамежныя ЛЭП з Беларуссю. Таму гэтае рашэнне было чаканым, хоць беларускія энергетыкі пакуль не атрымалі афіцыйнага паведамлення ад літоўскага боку, паведамілі ў Міністэрстве.
У панядзелак Дзяржаўная рада па рэгуляванні энергетыкі Літвы ўхваліла зніжэнне максімальнай прапускной здольнасці электрасетак з Беларусі.
Літва мае намер не дапусціць на свой рынак непасрэдных паставак электраэнергіі з БелАЭС, якую ў Вільні лічаць небяспечнай.
У краіне таксама прынятыя меры для таго, каб беларуская электраэнергія не трапіла ў нацыянальную энергасістэму ў межах яе імпарту з Расіі праз Латвію.
