Аршанскі дом Караткевіча плануюць знесці

Аршанскі дом Уладзіміра Караткевіча плануецца знесці. Такі намер мае патэнцыйны пакупнік дома, піша мясцовы сайт orsha.eu. На месцы знесенага дома ён хоча пабудаваць сабе новае жыллё. 

Будынак не ўнесены ў спіс гісторыка-культурнай спадычы і не ахоўваецца дзяржавай. 

У ім пакуль што засталіся некаторыя кнігі, а таксама камода, якую Караткевіч падарыў сваёй пляменніцы.

Як распавядала Еўрарадыё, аб продажы дома стала вядома напярэдадні. Яго прадаюць амаль за 34 тысячы рублёў (17 тысяч долараў). У гэтым доме Караткевіч напісаў "Дзікае паляванне караля Стаха". Пасля ад'езду пісьменніка ў Мінск у гэтым доме жылі ягоныя бацькі, а потым пляменніца з мужам. Пасля іх смерці будынак адышоў да далёкай сваячкі, якая жыве ў Адэсе і хоча прадаць маёмасць.