Апейкін: быў запыт пра спісы спартыўных функцыянераў, уезд якіх у ЕС непажаданы
Выканаўчы дырэктар Беларускага фонду спартыўнай салідарнасці Аляксандр Апейкін выказаўся пра наступствы скандальнай паездкі кіраўніка АБФФ Уладзіміра Базанава ў Чэхію. На яе звярнулі ўвагу і еўрапейскія СМІ, і палітыкі. Той жа міністр замежных спраў Чэхіі Якуб Кулганек заявіў, што "сябрам і саюзнікам Лукашэнкі няма чаго рабіць у Чэхіі". Па словах Апейкіна, Беларускі фонд спартыўнай салідарнасці атрымаў запыт з просьбай даслаць спісы беларускіх спартыўных функцыянераў, уезд якіх у ЕС непажаданы. Адкуль ён прыйшоў, выканаўчы дырэктар BSSF не ўдакладніў. Але зусім магчыма, што ў Еўрасаюзе могуць з'явіцца "чорныя спісы" гэтых чыноўнікаў.
Кіраўнік Беларускай федэрацыі футбола Уладзімір Базанаў прыехаў у Чэхію разам з жонкай. Аднак яны больш за восем гадзін правялі ў паліцыі, ім анулявалі шэнгенскія візы і запатрабавалі на працягу сутак пакінуць гэтую краіну.
