Амаль 200 магіл за паўгода — Reuters пра могілкі, дзе хаваюць "вагнераўцаў"

За паўгода ўчастак на могілках у Краснадарскім краі, дзе хаваюць байцоў прыватнай ваеннай кампаніі "Вагнер", амаль поўнасцю запоўніўся. Прычым большасць новых магіл з'явілася тут у апошнія два месяцы. У лістападзе на могілках было ўсяго тры шэрагі магіл. Расследаванне публікуе Reuters.

На працягу гэтых месяцаў "Вагнер" вёў кровапралітную бітву на знясіленне за ўзяцце гарадоў Бахмут і Салядар ва ўсходняй частцы Данецкай вобласці Украіны. Заходнія і ўкраінскія афіцыйныя асобы заявілі, што яны выкарыстоўваюць асуджаных у якасці гарматнага мяса, каб здушыць абараназдольнасць Украіны", нагадвае агенцтва.

Могілкі размешчаныя на ўскраіне станіцы Бакінскай. У канцы студзеня журналісты агенцтва налічылі тут каля 200 магіл. Яны здолелі прасачыць лёс 39 чалавек. 10 з іх да вайны знаходзіліся ў турме за забойства, 24 — за рабаванні і двое — за нанясенне цяжкіх цялесных пашкоджанняў. Астатнія — за наркотыкі і шантаж. Драўляныя шыльдачкі на магілах бакінскіх і трох бліжэйшых да іх могілак "паказваюць, што мужчыны загінулі ў перыяд з ліпеня па снежань 2022 года, у разгар бітвы за Бахмут".