"Акрэсціна — канцлагер. Але я ў парадку". На волю выйшла Наталля Дуліна

Наталля Дуліна 
Наталля Дуліна 

Пасля сутак на Акрэсціна на волю выйшла Наталля Дуліна, былая дацэнтка Мінскага дзяржаўнага лінгвістычнага ўніверсітэта і адна з вядучых спецыялістак краіны па італьянскай мове.

Пра яе затрыманне стала вядома 1 сакавіка. Яе асудзілі на 14 сутак. Вядома, што падчас суда Дуліна адмовілася ад адваката і дачы паказанняў. У тыя дні ў краіне праходзілі антываенныя мітынгі.

"Я выйшла. Акрэсціна, вядома, канцлагер. Але я ў парадку. Мы незабівальныя", — напісала педагог у Facebook.

Напярэдадні таксама стала вядома пра вызваленне дзяўчат-дачок пісьменніцы і педагога Ганны Севярынец. Іх таксама затрымалі на антываеннай акцыі каля чыгуначнага вакзала ў Мінску, ім прысудзілі адміністрацыйны арышт.

"Люба з тэмпературай, Жэня нічога, абедзве белыя, як паперкі, але бадзёрыя", — напісала Ганна Севярынец у Facebook. Дзяўчаты расказалі ёй, што ў камеры на 18 кв. м знаходзілася 32 чалавекі.

"Спалі на падлозе. Наогул умовы дзікія, але людзі сустрэліся там цудоўныя", — перадала яна словы дачок.

Падчас антываенных акцый толькі 27 лютага ў Беларусі, паводле звестак праваабаронцаў, затрымалі больш за паўтысячы чалавек. МУС пазней ўдакладніла лічбу — "за розныя парушэнні грамадскага парадку" у той дзень было затрымана каля 800 чалавек.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі