Агучана афіцыйная версія прычыны смерці ў Рэчыцы Дзмітрыя Усхопава
Агучана афіцыйная версія прычыны смерці ў Рэчыцы 27-гадовага Дзмітрыя Усхопава. Следчы камітэт заявіў, што "згодна з заключэннем судова-медыцынскай экспертызы, смерць жыхара Рэчыцы наступіла ў выніку камбінаванага атручання этылавым спіртам і асабліва небяспечным псіхатропным рэчывам — тэтрагідраканабінолам".
Тэтрагідраканабінол — гэта рэчыва, якое ўтрымліваецца ў каноплях. Такім чынам, СК сцвярджае, што Усхопаў памёр ад гарэлкі з марыхуанай (толькі называе марыхуану доўгім і незразумелым словам). Ацаніць верагоднасць гэтага можа кожны, хто ведае, што такое гарэлка і што такое марыхуана.
Таксама сцвярджаецца, што "былі выяўленыя прыкметы захворванняў сардэчна-сасудзістай сістэмы, якія маглі спрыяць наступленню смерці ад камбінаванага атручвання".
