Аднагадовае дзіця ў Магілёве атруцілася нікацінам
У Магілёве аднагадовага хлопчыка шпіталізавалі ў абласную дзіцячую лякарню, бо дзіця атруцілася нікацінам.
Дзіця змясцілі ў рэанімацыю з прыкметамі цяжкай інтаксікацыі, паведамляе sputnik.by. Маці хлопчыка своечасова заўважыла, што стан сына рэзка пагоршыўся — дзіця стала млявым. У роце малечы жанчына пабачыла рэшткі цыгарэты.
Па звестках тэлеканала "Беларусь 4", малы знайшоў у кватэры цыгарэту і вырашыў пажаваць яе. Выкліканыя медыкі зрабілі хлопчыку прамыванне страўніка. Цяпер яго стан не выклікае апасенняў.
Медыкі кажуць, што нікацін можа быць асабліва небяспечным для маленькіх дзяцей: ён добра ўсмоктваецца ў арганізм праз ротавую поласць. Такое атручанне можа прывесці да комы ці нават смерці дзіцяці.
