Абхазія: распаўсюджвальнікам наркотыкаў пагражае смяротнае пакаранне

Закон аб вышэйшай меры пакарання для распаўсюджвальнікаў наркотыкаў прыняты ў Абхазіі, інфармуе JAMnews. Цяпер за абарот наркатычных сродкаў у асабліва буйных памерах будзе прызначацца пажыццёвае пазбаўленне волі або смяротнае пакаранне.

Закон набудзе моц першага студзеня 2020 года. Па словах аўтара законапраекта дэпутата Дзмітрыя Дбара, у сілавых ведамстваў ёсць час падрыхтавацца да яго выканання.

Гэтае рашэнне можа лічыцца выключным, бо ў Абхазіі з 1993 года дзейнічаў мараторый на смяротнае пакаранне. На гэты момант у Абхазіі ёсць трое пажыццёва асуджаных.

Новаўвядзенне падзяліла грамадства на два лагеры:

"Я б здзівілася гэтаму рашэнню, калі б пару гадоў таму нашы заканадаўцы не забаранілі аборты. Пасля таго забароны яны проста трымаюць свой курс на Саудаўскую Аравію", — піша інтэрнет-карыстальніца.

"Нашых дзяцей забіваюць кожны дзень, зарабляючы на ​​іх жыццях, можа, калі хаця б дваіх наркадылераў пазбавіць іх уласных, хтосьці адумаецца і спалохаецца?" — сустракаюцца і такія меркаванні.

На постсавецкай прасторы смяротнае пакаранне дазволенае законам толькі ў Беларусі, у іншых месцах або адмовіліся ад смяротнага пакарання ці ўвялі на яго мараторый.