Зняволеныя ў Беларусі змогуць атрымліваць вышэйшую адукацыю

Зняволеныя ў Беларусі змогуць дыстанцыйна атрымліваць вышэйшую адукацыю. Пра гэта паведаміў намеснік начальніка па арганізацыі папраўчага працэсу Дэпартамента выканання пакаранняў МУС па Гомельскай вобласці Алег Літвінаў. Паводле яго слоў, эксперыментальны праект пачне рэалізоўвацца ў гомельскай папраўчай калоніі № 4, якая з'яўляецца жаночай. У ёй адкрыюць Цэнтр дыстанцыйнага доступу да электроннага адукацыйнага асяроддзя.

Як інфармуе БЕЛТА, атрымаць вышэйшую адукацыю па спецыяльнасцях "псіхалогія", "юрыспрудэнцыя" і "менеджмент" маюць намер 16 жанчын. Аднак студэнткамі яны стануць толькі пасля паспяховай здачы першай сесіі. Навучанне будзе працягвацца 4 гады.

У сумесным міжнародным сацыяльным праекце "Адукацыя адкрывае дзверы" паўдзельнічалі Дэпартамент выканання пакаранняў МУС Беларусі, таварыства Deutscher Volkshochschul-Verband (Нямеччына) і Гомельскае абласное грамадскае аб'яднанне"Сацыяльныя праекты".

Фота: ria.ru, gp.by