“Зніжка на аплату кватэры ў 40 тысяч рублёў. Хіба гэта зніжка?”

“Вось учора чула, што мы будзем узнагароджваць ветэранаў, ніхто не будзе забыты, што ўсіх неяк адзначаць. Але ўжо год-два гэтага няма! Ёсць жа ветэраны і па 90 гадоў, каб хоць патэлефанавалі на дзень нараджэння!” — 83-гадовая блакадніца Ніна Васільеўна Вашчукова з Мінска хоць абураецца па-ветэранску, але планаў на сёння мае шмат:

“Праз 10 хвілін зяць прыедзе да зубнога мяне павязе. Зіма была суровая: не выходзіла, хварэла. А пасля зубнога паедзем на могілкі да мужа”, — распавядае пра свае бытавыя праблемы Ніна Васільеўна. Пачуць бадзёры голас 84-гадовай жанчыны, якая перажыла блакаду, для мяне было нечакана і прыемна. Жанчына цудоўна памятае, як у блакадзе зарабляла ежу разам з братам. 

Мала таго, што ветэраны збіраюцца да стаматолага, яны яшчэ карыстаюцца мабільнікамі (!), самастойна ездзяць на дачы і маюць на ўсе дзяржаўныя падзеі ў краіне сваё меркаванне.

Ніна Васільеўна жыве ў трохпакаёўцы і мае зніжку на аплату камуналкі. Але зніжка гэта жанчыну бянтэжыць…

“Прыкладна 270 тысяч за кватэру, але можа 40 тысяч зніжка там за нешта”, — падлічвае Ніна Васільеўна і папярэджвае, што яна не ные, не скардзіцца.

“Вось лекі ў мяне бясплатныя, на тэлефон маю зніжку, праезд бясплатны зрабілі. Але куды мне ездзіць — я ж нікуды не езджу!”

Паводле слоў намміністра працы і сацыяльнай абароны Аляксандра Румака, да працоўнай пенсіі ветэранам прадугледжаны надбаўкі: да прыкладу, блакаднікам Ленінграда — 100% ад мінімальнага памеру пенсіі па ўзросце (гэта 243 тысячы рублёў). Ніна Васільеўна атрымлівае 2,2 мільёна рублёў пенсіі.

“Не скажу, каб я асабліва шыкавала, што захацела — пайшла і купіла. Мне не трэба купляць вопратку, пенсія — абы каб не памерла. Але ў мяне яшчэ што — у знаёмай пенсія ўвогуле 1,8 мільёна! Вечна лічыш гэтыя капейкі! Неяк увосень давалі на гародніну, а зараз нічога. Хоць бы да свята 100 рублёў давалі… І вельмі ўсе незадаволеныя гэтым”, — заўважае ветэран і спадзяецца, што пенсію падымуць цягам часу.

Пенсія Ніны Васільеўны амаль на 100 долараў меншая за сярэднестатыстычную пенсію ветэранаў вайны (за травень — 2,944 мільёна рублёў).

Дарэчы, па статыстыцы, з траўня 2009 па травень 2013 з жыцця пайшлі амаль 24 тысячы ўдзельнікаў вайны. Сёння з намі няма паловы ветэранаў, якія жылі ў Беларусі ў 2009 годзе! Сёння агульная колькасць ветэранаў Вялікай Айчыннай вайны складае болей за 25 тысяч чалавек.

1 чэрвеня 2009 года ў Беларусі жылі 19 Герояў Савецкага Саюза, 12 чэрвеня — ужо 18… Сёння іх шасцёра — але радуе, што ніхто не памёр за апошні год. Жывы і адзіны ў Беларусі кавалер ордэна Славы трох ступеняў Віктар Веташкін.

У 2013-м са Дня Перамогі спаўняецца 68 гадоў. Год неюбілейны, таму ніякіх надзвычайных урачыстасцяў не запланавана. Ветэраны Вялікай Айчыннай атрымаюць звычайныя надбаўкі да пенсіяў: ад 50 да 500 адсоткаў мінімальнага памеру пенсіі па ўзросце.