Затрыманых мінскай міліцыяй журналістаў адпусцілі
Некалькі гадзін яны правялі ў Ленінскім РУУС сталіцы.
Як паведамляла Еўрарадыё, каля суда Цэнтральнага раёна міліцыя схапіла відэааператара БелаПАН Сяргея Сацюка, яго калегу Аляксандра Баразенку і незалежную журналістку Наталлю Валакіду. Здарылася гэта перад пачаткам суда над вядомым грамадскім актывістам Юрыем Рубцовым і адразу пасля заканчэння візіту ў Беларусь прадстаўніка АБСЕ па пытаннях свабоды СМІ Дуні Міятавіч.
Як інфармуе БелаПАН, разам з журналістамі быў затрыманы грамадскі актывіст Ілля Дабратвор, які прыйшоў у майцы з надпісам "Свабоду палітвязням". Дзе ён знаходзіцца, невядома. Журналістаў адпусцілі праз тры гадзіны.
Што да суда над Рубцовым, дык ён працягнецца 6 кастрычніка.
Фота з Facebook Аляксандра Баразенкі.