Залатая рыбка, кінуты лобстар і спаборніцтвы па ляноце: толькі добрыя навіны

101-гадовая амерыканка эфектна кінула за борт лобстара і стала гераіняй мемаў, а аўстралійскі рыбак злавіў вялізную залатую рыбку.

Пра што будзе расказваць у сваім інстаграме Анджэліна Джалі і як прайшла "Алімпіяда" па ляноце — пра гэта і не толькі ў аглядзе самых добрых, смешных, а часам абсурдных навін на Еўрарадыё.

Кінуты лобстар

101-гадовая амерыканка Вірджынія Олівер любіць лавіць амараў. Дзякуючы свайму захапленню каларытная бабуля стала гераіняй мемаў. У сеціва трапіла фатаграфія, на якой жанчына эфектна шпурляе лобстараў за борт судна, і яна адразу стала папулярнай у сацсетках.

Фота апублікаваў у твітары журналіст і блогер BudrykZack. Ён заўважыў кадр у матэрыяле Boston Globe і прыйшоў у захапленне.

Карыстальнікі інтэрнэту тут жа выявілі падабенства Вірджыніі з супергероямі Marvel Торам і Доктарам Стрэнджам, а таксама іншымі персанажамі з выключнымі здольнасцямі.

Гіганцкая залатая рыбка

Аўстралійскі рыбак Брэт Мэтвэн злавіў гіганцкую залатую рыбку віду Erythrocles, якая важыць 10 кілаграмаў

Відэа пра свой улоў у час глыбакаводнай рыбалкі ён апублікаваў на ютубе.

На запісе чуваць, як прыяцель рыбака Брэд кажа: "Паглядзі, якая яна велізарная". У гэты момант ён спрабуе зацягнуць рыбіну на борт лодкі.

"Вось што атрымліваецца, калі ў дзяцінстве змываеш залатую рыбку па мянушцы Фрэд у прыбіральню", — пажартаваў Мэтвэн.

Інстаграм Анджэліны Джалі

Кінаактрыса і спецыяльны пасланнік Упраўлення вярхоўнага камісара ААН па справах бежанцаў Анджэліна Джалі зарэгістравалася ў інстаграме.

У сваім першым паведамленні яна заклікае звярнуць увагу на сітуацыю ў Афганістане, які захапіў тэрарыстычны "Талібан".

Актрыса абяцае, што будзе дзяліцца з падпісантамі гісторыямі жыхароў Афганістана, якія губляюць магчымасць свабодна камунікаваць у сацыяльных сетках і свабодна выказваць свае думкі.

На старонцы апублікаваны ліст афганскай дзяўчынкі, у якім яна расказвае пра свае адчуванні і стаўленне грамадства да таго, што да ўлады прыйшлі талібы. Яна піша, што сярод жыхароў прыкметны страх, хоць ёсць тыя, хто лічыць, што "талібы змяніліся". Дзяўчынка прызнаецца, што не верыць у станоўчыя перамены гэтага руху, таму што ў іх "вельмі дрэннае мінулае".

Таксама дзяўчынка непакоіцца, што цяпер не зможа наведваць заняткі і ў далейшым працаваць. "Мы думаем, што нашы правы парушаюцца", — дадала яна.

Вада на Марсе

Навукоўцы НАСА вывучылі фатаграфіі "чарнічын", якія зрабіў марсаход Curiosity у 2004 годзе, і выказалі здагадку, што гэтыя камяні, падобныя да дробнай галькі, могуць быць гідрагематытам.

Гідрагематыт — гэта разнавіднасць шырока распаўсюджанага на Зямлі жалезазмяшчальнага мінералу гематыту, інакш — чырвонага жалезняку. Ён адносіцца да групы гідравокіслаў і змяшчае да васьмі адсоткаў вады.

Раней "чарнічыны" ідэнтыфікавалі проста як гематыт, пазбаўлены вады, таму што ў марсахода няма тэхналогій, здольных адрозніць гематыт ад гідрагематыту. Гідрагематыт, як і гематыт, мае чырвоны колер, і ён цалкам адпавядае асноўнаму адценню марсіянскіх ландшафтаў.

Да новых высноў навукоўцаў з ЗША падштурхнуў узор гідрагематыту, знойдзены ў 1843 годзе нямецкім мінералагам Іаганам Фрыдрыхам Аўгустам Брэйтгаўптам. Ён захоўваецца ў калекцыі Смітсанаўскага інстытута.

Спаборніцтвы па ляноце

Чатыры мужчыны з Чарнагорыі выявілі стойкасць, рашучасць і... велізарную колькасць гультайства, стаўшы пераможцамі "Сусветных лянівых Алімпійскіх гульняў".

Удзельнікам не патрабавалася дэманстраваць спартыўнае майстэрства. На самай справе яны нічога не рабілі, акрамя таго як ляжалі на матрацы 49 гадзін, каб забраць дадому славу.

"Алімпійцы" пабілі рэкорд леташніх спаборніцтваў, які склаў 48,5 гадзіны.