За паўтара сутак у Шаркаўшчыне выпала месячная норма ападкаў
У Шаркаўшчыне Віцебскай вобласці за паўтара сутак выпала месячная норма ападкаў. Пра гэта паведамляе БЕЛТА са спасылкай на абласны цэнтр па гідраметэаралогіі і маніторынгу навакольнага прыроднага асяроддзя.
Вільготнае восеньскае надвор'е прыйшло на Віцебшчыну. Па большай частцы тэрыторыі вобласці выпалі моцныя дажджы. Сіноптыкі кажуць, што за 23 жніўня і сённяшнюю ноч у вобласці выпала ад 39 да 64 мм ападкаў.
Акрамя Шаркаўшчыны стыхія не пашкадавала і іншыя раёны. Дзве дэкадныя нормы ападкаў выпалі ў Езярышчы, Лынтупах, Полацку, Сянне, Оршы. У Віцебску, Докшыцах, Лепелі і на тэрыторыі Бярэзінскага запаведніка выпала паўтары дэкадныя нормы.
Пры гэтым тэмпература паветра даволі халаднаватая — на 1-4 градусы ніжэй за норму.
