Вярхоўны суд пакінуў вырак па справе "банды Молнара" без змены
17 лістапада судовая калегія па крымінальных справах Вярхоўнага суда разгледзела апеляцыю на прысуд па справе так званай "банды Молнара". Як перадае БЕЛТА, прысуд Магілёўскага абласнога суда пакінуты без змены, а апеляцыйныя скаргі — без задавальнення.
Суд па гэтай справе пачаўся ў сакавіку 2017-га і быў закрытым. 53-гадовага ўраджэнца Бабруйска Сяргея Молнара і яго "падзельнікаў" прызналі вінаватымі ў стварэнні злачыннай арганізацыі, у кіраўніцтве злачыннай арганізацыяй і ўдзеле ў ёй, а таксама іншых злачынствах.
Магілёўскі абласны суд асудзіў Молнара на 18 гадоў калоніі ўзмоцненага рэжыму з канфіскацыяй маёмасці. Таксама ён пазбаўлены права займаць пасады, звязаныя з выкананнем юрыдычна значных дзеянняў, тэрмінам на 5 гадоў і пазбаўлены права займацца прадпрымальніцкай дзейнасцю тэрмінам на 5 гадоў. Астатнія 29 абвінавачаных атрымалі ад 5 да 15 гадоў пазбаўлення волі. У фігурантаў у тым ліку канфіскаваныя ювелірныя вырабы.
Пракурор аддзела Генпракуратуры Алег Буйлянкоў патлумачыў журналістам, што на збор доказаў па гэтай справе спатрэбіліся месяцы і гады. "Можна сказаць, што ў гэтым дзесяцігоддзі гэта дастаткова буйная і сур'ёзная злачынная арганізацыя, якая існавала на тэрыторыі Беларусі і была выяўленая і адпаведна прыцягнута да крымінальнай адказнасці за тыя злачынствы, якія былі даказаныя", — канстатаваў пракурор.
Буйлянкоў падкрэсліў, што незаконныя метады ўздзеяння на ўсіх удзельнікаў крымінальнай справы не дапускаліся. "Заявы, якія рабіліся абвінавачанымі ці іншымі асобамі, адпаведна правяраліся, ім давалася ацэнка і судом, і тымі асобамі, якія праводзілі праверку", — матлумачыў ён.
Паводле суда, "банда Молнара" здзяйсняла цяжкія і асабліва цяжкія злачынствы ў Магілёўскай вобласці з 2009 па 2014 год. На судовым працэсе былі разгледжаныя больш за 100 тамоў крымінальнай справы, па якой праходзіла больш за 500 пацярпелых. У матэрыялах фігуравалі больш за 80 эпізодаў злачыннай дзейнасці. Паведамляецца, што фігуранты справы займаліся рэкетам, разбоем, махлярствам, чорным рыэлтарствам, вымагальніцтвам, выкраданнем людзей.
