Вільня можа стаць першым горадам “без забаронаў”
![Вільня можа стаць першым горадам “без забаронаў”](/sites/default/files/styles/gallery_main/public/2023-08/13315548_1197593910286011_9120776859289074259_n.jpg.webp?itok=A7ut-GSJ)
Мэр Вільні Рэмігіюс Шымашус прадставіў новую ініцыятыву, паводле якой забараняльныя знакі будуць замененыя на пазітыўныя знакі з парадамі.
“Вільня становіцца першым горадам без забаронаў. Правілы пражывання пачынаюць падавацца тут прыязна, у выглядзе парадаў”, — напісаў мэр на сваёй старонцы ў Фэйсбуку.
На думку Шымашуса, парады, якія будуць давацца на знаках, нашмат больш інфарматыўныя, чым перакрэсленыя знакі з забаронай.
Цяпер, да прыкладу, замест знака “Забаронена ўжываць алкаголь” з’явіцца знак “Зона цвярозасці”, замест “Паліць забаронена” — “Зона без дыму”. А замест знакаў, якія забараняюць выгул сабак, з’явяцца таблічкі з надпісамі “Зона бяспечных прагулак”.
Жыхары горада пазітыўна ацанілі ініцыятыву мэра. Але прапанавалі дубляваць надпісы па-англійску, бо некаторыя таблічкі могуць быць незразумелымі для гасцей Вільні. Да прыкладу, постаць сабакі, які рухаецца на хвалях — гэта “Пляж для хатніх жывёлаў”, а зону цвярозасці абазначае шклянка з морквай.