Валерый Цапкала з'ехаў з Беларусі разам з дзецьмі — у Расію
Валерый Цапкала, які вылучаўся на прэзідэнцкія выбары, з'ехаў з Беларусі разам з дзецьмі. Як заявіла яго жонка Вераніка, яны выехалі ў Расію.
Па інфармацыі, якую Еўрарадыё атрымала ад аднаго з прадстаўнікоў штаба Валерыя Цапкалы, на палітыка вядзецца пракурорская праверка. Днямі супрацоўнікі пракуратуры прыйшлі ў школу, дзе навучаюцца дзеці Валерыя і Веранікі Цапкала, і папрасілі настаўнікаў напісаць нейкія заявы. Пара расцаніла гэта як пагрозу страціць бацькоўскія правы — таму вырашыла, пакуль не позна, вывезці дзяцей з краіны.
У Цапкалаў два сыны.
Пасля таго, як ЦВК не зарэгістраваў Цапкалу кандыдатам у прэзідэнты, ён і яго жонка ўвайшлі ў аб'яднаны штаб Святланы Ціханоўскай. Вераніка падкрэслівае, што яна застаецца ў Беларусі і працягне дзейнасць у штабе.
Раней сваіх дзяцей за межы Беларусі вывезла кандыдатка ў прэзідэнты Святлана Ціханоўская. Яна паведаміла, што яе дзеці знаходзяцца ў адной з краінаў Еўрасаюза.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.