УСУ, па словах Зяленскага, рыхтуюць прасоўванне наперад — 275-я раніца вайны

УСУ трымаюць абарону ў раёне Бахмута і атакуюць на Купянскім і Ліманскім кірунках / facebook.com/GeneralStaff.ua

Расіяне павінны сысці з Крыма — Уладзімір Зяленскі заклікае не марнаваць час на варыянты, якія не прадугледжваюць дэакупацыі паўвыспы. Пры гэтым ён прызнаўся, што быў бы рады, калі б гэтае пытанне вырашылася "неваенным шляхам". Пра гэта ўкраінскі прэзідэнт казаў у інтэрв'ю Financial Times.

Выданне са свайго боку адзначае, што некаторыя заходнія палітыкі занепакоеныя намерам Украіны вярнуць Крым. На іх думку, гэта можа прывесці да "небяспечнай эскалацыі" — Масква можа нават адважыцца ўжыць ядзерную зброю. Але Зяленскі быў непахісны: "Калі рашэнне не прадугледжвае дэакупацыю, і Крым з'яўляецца часткай Расейскай Федэрацыі, ніхто не павінен марнаваць на гэты час. Гэта пустая трата часу". І атакі на інфраструктуру Украіны, па яго словах, не аслабяць рашучасці украінцаў вызваліць усю акупаваную тэрыторыю.

"Мы павінны вярнуць усе землі... Калі вы не можаце цалкам вярнуць сваю зямлю, вайна проста будзе замарожаная. Гэта пытанне часу, калі яна адновіцца", — сказаў Зяленскі.

На вечар чацвярга з-за расійскіх нападаў на ўкраінскую інфраструктуру праблемы з вадой захоўваліся яшчэ ў 15 абласцях Украіны. Пра гэта Зяленскі казаў у традыцыйным відэазвароце. "Сітуацыя з электрычнасцю застаецца складанай амаль ва ўсіх рэгіёнах. Але ўсё ж патроху адыходзім ад блэкаўта — кожную гадзіну вяртаем энэргазабяспячэнне новым і новым спажыўцам", — адзначыў ён. Зяленскі казаў і аб сітуацыі на фронце. Паводле яго слоў, Сілы абароны Украіны трымаюць ключавыя рубяжы на ўсіх напрамках фронту. На некаторых напрамках — рыхтуюцца прасунуцца наперад.

Генштаб УСУ паведамляе ў ранішняй зводцы, што расіяне па-ранейшаму атакуюць ў Луганскай і Данецкай абласцях. Украінскія Сілы абароны за суткі адбілі атакі каля населеных пунктаў Стэльмахоўка і Дзіброва (гэта раён Крэмянной ў Луганскай вобласці) і Белагораўка, Якаўлеўка, Бахмуцкае, Опытнае, Першамайскае, Краснагораўка, Мар'інка і Наваміхайлаўка ў Данецкай вобласці. На Купянскім і Лиманском напрамках расіяне вымушаныя абараняцца. На Крыварожскім і Херсонскім УС РФ "не спыняюць артылерыйскія абстрэлы" украінскіх пазіцый і населеных пунктаў на правым беразе Дняпра, кажуць у Генштабе УСУ.

Вячэрні абстрэл Херсона, нагадаем, прыйшоўся на жылыя кварталы горада. Загінулі сем чалавек, больш за 20 атрымалі раненні. Пра гэта ўначы напісаў кіраўнік Херсонскай абласной вайсковай адміністрацыі Яраслаў Янушэвіч.

Украінская паліцыя заклікае сем'і з дзецьмі, якія застаюцца ў Бахмуце пад расійскімі абстрэламі, усё ж эвакуявацца. У Бахмуце і прыгарадах цяпер пражываюць каля 15 тысяч чалавек, з іх 306 —  гэта дзеці. А у Бахмцкім раёне і зусім больш двух тысяч дзяцей (большасць - у Тарэцкай грамадзе).

У паліцыі адзначаюць, што дзеці жывуць па сутнасці "у бесчалавечных умовах", у іх няма доступу да медыцынскіх паслуг, яны не вучацца. Ёсць магчымасць з'ехаць, ваенная адміністрацыя і валанцёры гатовыя дапамагчы з эвакуацыяй, але жадаючых з'ехаць няшмат.

"Пераканаўча звяртаюся да бацькоў: ратуйце вашых дзяцей. Згодна з законам, дарослыя абавязаны забяспечыць дзецям бяспеку і належныя ўмовы жыцця. Калі вы вырашылі заставацца пад агнём, то дзіця павінна быць эвакуіравана ў суправаджэнні аднаго з бацькоў або даверанай асобы. Паліцыя арганізуе выезд, а ўлада — прадаставіць бясплатнае жыллё, забяспечыць сацыяльную дапамогу", — заклікаў бацькоў начальнік Нацпаліцыі ў Данецкай вобласці Руслан Асіпенка. Яго словы прыводзіць УНІАН.

У Бахмуцкім раёне пад абстрэламі застаюцца больш за дзве тысячы дзяцей / Нацыянальная паліцыя Украіны

Германія адмовілася перадаваць Кіеву зенітна-ракетныя комплексы Patriot, якія яна раней прапанавала Польшчы. У Берліне заявілі, што гэтыя ЗРК прызначаныя для выкарыстання на тэрыторыі NATO.

"Гэтыя Patriot з'яўляюцца часткай інтэграванай супрацьпаветранай абароны NATO, гэта значыць яны прызначаныя для размяшчэння на тэрыторыі NATO", — заявіла міністр абароны Германіі Крысцін Ламбрехт. Яе словы прыводзіць Reuters.

Нагадаем, Берлін прапанаваў Варшаве сістэму Patriot, каб дапамагчы абараніць сваю паветраную прастору пасля падзення на мінулым тыдні ў Польшчы ракеты, тады загінулі два чалавекі. А міністр нацыянальнай абароны Польшчы Марыюш Блашчак папрасіў Германію адправіць гэтыя ЗРК ва Украіну, каб Кіеў мог усталяваць іх на сваёй заходняй мяжы. На думку польскага міністра, такое рашэнне абараніла б Украіну ад далейшых ахвяр і блэкаўта, а таксама павысіла б бяспеку на польскай мяжы.

Парламент Нідэрландаў ўчора прызнаў Расію дзяржавай-спонсарам тэрарызму з-за ваенных дзеянняў у Украіне. Пра гэта паведамляе выданне trouw.nl. Нагадаем, 23 лістапада такое рашэнне прыняў Еўрапарламент. А днём раней Парламенцкая асамблея NATO заклікала стварыць спецыяльны міжнародны трыбунал для пакарання расійскіх злачынцаў і прызнала РФ дзяржавай-тэрарыстам. Рашэнне падтрымалі ўсе 30 краін-членаў альянсу.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.