У ЗША назвалі варварствам тое, што Расія робіць са сваімі салдатамі
Украінскі вайсковец на занятай расійскай пазіцыі / АР
Каардынатар Савета нацыянальнай бяспекі Белага дома Джон Кірбі назваў варварствам тое, што Расія робіць са сваімі салдатамі. На брыфінгу ў Вашынгтоне ён заявіў, што расійскія камандзіры расстрэльваюць салдат, якія адмаўляюцца выконваць загады, а таксама пагражаюць расстрэлам цэлым падраздзяленням, калі тыя паспрабуюць адступіць пад агнём артылерыі на фронце ва Украіне.
Кірбі не стаў паглыбляцца ў падрабязнасці таго, на чым грунтуецца гэтая інфармацыя і пра якія менавіта падраздзяленні або участкі фронту ідзе гаворка, а таксама наколькі распаўсюджаная падобная практыка ў расійскай арміі. Паводле яго слоў, Расія "працягвае дэманстраваць абыякавасць да жыцця сваіх салдат" і ЗША лічаць, што колькасць ваенных страт за апошні час ідзе на тысячы, прычым "некаторыя з іх — па загадзе іх уласных лідараў", паведамляе "Голас Амерыкі".
"Расійскія вайскоўцы, падобна, выкарыстоўваюць так званую тактыку "чалавечай хвалі", проста кідаючы ў бой масы гэтых дрэнна навучаных салдат. Без належнага рыштунку, без кіраўніцтва, без рэсурсаў, без падтрымкі", — адзначыў Джон Кірбі. Гэта цалкам адпавядае таму, што ўкраінскія вайскоўцы назіраюць апошнім часам пад Аўдзееўкай. Ваенная разведка Вялікабрытаніі паведамляла, што страты там расіян павялічыліся на 90%.
Напярэдадні ЗША аб'явілі пра чарговы пакет вайсковай дапамогі Украіне.
