У Вільні агрэсіўнага бабра пасадзілі на 14 сутак (фота)
Здарэнне адбылося раніцай у панядзелак. Бабёр прыйшоў на тэрыторыю віленскай гімназіі імя Яна Паўла II.
Яго там заўважыў кіроўца таксоўкі. Ён стаў сведкам, як "госць" напаў на ката. На месца прыехалі паліцыянты, якія вырашалі, што рабіць з бабром, які самастойна сыходзіць не збіраўся, інфармуе сайт delfi.lt.
Пазней на месца прыехалі супрацоўнікі каўнаскай службы аховы жывёлаў. Яны злавілі бабра і змясцілі ў клетку. Жывёла вяла сябе агрэсіўна, кідалася на людзей. Таму бабра вырашылі не адпускаць у вадаём, а пасадзіць на каранцін на 14 дзён. Па іроніі лёсу, ён патрапіў у клетку для катоў.
