У Віцебску "шэрыя рыэлтары" выкралі жанчыну, якая адмовілася прадаваць жыллё
![Дом, дзе ўтрымлівалі выкрадзеную жанчыну / sk.gov.by](/sites/default/files/styles/gallery_main/public/2023-08/vitebsk_20_02.jpg.webp?itok=eJ0sAzBa)
Дом, дзе ўтрымлівалі выкрадзеную жанчыну / sk.gov.by
Сямейную пару з Віцебска абвінавачваюць у выкраданні чалавека. Муж і жонка спрабавалі пераканаць іншую сямейную пару прадаць ім кватэру. У кватэры жыў мужчына, і ў яго ўтварыўся вялікі доўг па камунальных плацяжах. Пра гэты доўг ён расказаў абвінавачанаму. Той прапанаваў дапамагчы — прадаць гэтую кватэру і купіць таннейшае жыллё. Мужчына пагадзіўся, але ўдакладніў, што разам з ім прапісаная жонка.
"Прадпрымальны абвінавачаны, атрымаўшы дакументы на кватэру, разам са сваёй 36-гадовай жонкай вывез уладальніка квадратных метраў у Лёзненскі раён і пасяліў яго ў сваіх знаёмых", а сам накіраваўся да гаспадыні кватэры, расказалі ў Следчым камітэце Беларусі.
Жанчына ад здзелкі адмовілася. Яе прывезлі да мужа ў Лёзненскі раён, каб ён дапамог угаварыць яе. Але той ужо зразумеў, што здзелка выглядае нявыгаднай, і папрасіў жонку нічога не падпісваць. "Рыэлтары" тым не менш звазілі жанчыну сфатаграфавацца на пашпарт (у яе быў пратэрмінаваны дакумент), затым збілі яе і пакінулі пад наглядам у Лёзненскім раёне.
У нейкі момант жанчына ўгаварыла сваіх ахоўнікаў выпусціць яе пакурыць і пачала клікаць на дапамогу. Суседзі выклікалі міліцыю. Выкрадальнікаў затрымалі. Іх будуць судзіць.
![В Витебске "серые риэлторы" похитили женщину, которая отказалась продавать жилье](/sites/default/files/styles/default_image_paragraph/public/paragraphs/image/vitebsk_20_02_2.jpg.webp?itok=EfBCeGG-)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.