Вы тут

У свеце неспакойна: ЕС супраць Польшчы, стары сябар Байдэн і магчымасць Пялевіна

Кароткі агляд сусветных навін / калаж Улада Рубанава, Еўрарадыё

У "Паўночнага патоку" праблемы з сертыфікацыяй. А Джо Байдэн і Сі Цзіньпін дэманструюць, як трэба вырашаць праблемы.

І галоўная навіна дня: здаецца, хтосьці бачыў Пялевіна. Але гэта не дакладна.

 

У "Паўночнага патоку" праблемы

Але пакуль яны, хутчэй, тэхнічныя.

Рэгуляцыйны орган Германіі прыпыніў працэс зацвярджэння спрэчнага газаправода "Паўночны паток 2". У рашэнні гаворыцца, што трэба прывесці ўсе справы ў адпаведнасць нямецкаму заканадаўству, перш чым сертыфікаваць праект коштам 10 мільярдаў еўра.

Цэрымонія адкрыцця "Паўночнага патоку" / kremlin.ru

Цяпер Nord Stream 2 AG — швейцарская кампанія. Ёй трэба стварыць даччынае падраздзяленне ў Германіі, якое стане ўладальнікам і аператарам нямецкага ўчастка газаправода.

Гэта адкладзе ўвод трубы ў эксплуатацыю яшчэ на нейкі час. І нават калі будзе атрымана зялёнае святло ад Германіі, праект павінна будзе ўхваліць яшчэ і Еўракамісія.

"Газпрам" заяўляў, што "Паўночны паток" быў гатовы яшчэ ў верасні. У яго будаўніцтва ўклаліся і нямецкія кампаніі.

Крытыкі праекта асцерагаюцца, што трубаправод паставіць Еўропу ў яшчэ большую энергетычную залежнасць ад Расіі. Трубаправод праходзіць па дне Балтыйскага мора, ён падвоіць экспарт газу з Масквы ў Германію. Але абміне Украіну, якая ў такім выпадку можа моцна пацярпець ад страты транзітных збораў.

Вынік гэтага рашэння — аптовыя цэны на газ у Еўропе, з якімі ў гэтым сезоне і так не ўсё гладка, дасягнулі трохтыднёвага максімуму.
 

ЕС занепакоены

Сутыкненні Польшчы і ЕС праз пытанні незалежнасці судовай сістэмы працягваюцца.

Польскі міністр юстыцыі можа прызначаць суддзяў у суды найвышэйшай інстанцыі і здымаць іх без называння прычын. ЕС мяркуе, што, даўшы міністру такія паўнамоцтвы, Варшава парушыла законы аб'яднання. А прэзумпцыя невінаватасці можа апынуцца пад пагрозай, піша DW.

У мінулым месяцы ЕС ужо аштрафаваў Польшчу на 1 млрд еўра ў дзень па іншай справе, але таксама звязанай з судовай сістэмай. Міністр юстыцыі заявіў, што Польшча не павінна і не будзе плаціць ніводнага злотага.
 

"Мой стары сябар"

Калі вы думалі, што ў Кітая і ЗША халодная вайна, Сі Цзіньпін спяшаецца вас расчараваць. Або заблытаць. У часе ўчорашняга віртуальнага саміту з Джо Байдэнам ён назваў яго "старым сябрам".

Пакуль што размаўлялі дыстанцыйна: з пачатку пандэміі старшыня не пакідаў Кітая. Але Байдэн спадзяецца наступным разам сустрэцца і асабіста.

Байдэн прызнаў, што занепакоены пытаннем выканання правоў чалавека ў некаторых рэгіёнах КНР. Пагаварылі і пра Тайвань: ЗША прытрымліваюцца палітыкі аднаго Кітая і не збіраюцца выступаць за незалежнасць вострава. Абмеркавалі каранавірус і "несумленныя" гандлёвыя практыкі Кітая. Вашынгтон чакае ад Пекіна сумленнай канкурэнцыі.

Сі перакананы, што інтарэсы ЗША і Кітая пераплеценыя, і настойвае на неканфліктным суіснаванні.
 

Лічбавая гігіена ад Пялевіна

Ніхто не бачыў пісьменніка Віктара Пялевіна на публіцы 20 гадоў. Апошні раз ён з'явіўся на літаратурным сімпозіуме ў Токіа ў 2001 годзе — і ўсё.

Таму навіна ў тэлеграм-канале Mash, у якой гаварылася, быццам Пялевіна адсачылі ў Тайландзе, нарабіла шуму.

Автор снимка предполагает, что видел Пелевина / mash

Выданне таксама апублікавала запіс размовы з супрацоўніцай рэцэпцыі аднаго з гатэляў. Журналіст папрасіў звязаць яго з Пялевіным. На рэцэпцыі перанакіравалі званок у яго нумар. Потым пачуліся гудкі, запіс перарваўся.

Каардынаты месца, дзе адпачывае ці жыве Пелевін, раскрываць не сталі. Журналісты проста хацелі даказаць, што адсачыць можна каго заўгодна — нават філосафа.

Але ж прызнаем — хто з нас моцны ў дастатковай ступені, каб выконваць такую лічбавую гігіену?

 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.