У Швецыі разгарэўся скандал з спонсарам Еўрабачання-2013
Праваабаронцы абураныя, што галоўным спонсарам конкурсу выступае тэлекамунікацыйная кампанія TeliaSonora, якая мае "падмочаную" рэпутацыю.
Яе вінавацяць у прадастаўленні неабмежаванага доступу ўрадам постсавецкіх краін да прыватных тэлефонаў і электроннай пошты грамадзян.
Як адзначае сайт evrofor.ru, цяпер ідзе расследаванне дзейнасці гэтай кампаніі. TeliaSonora вінавацяць у тым, што яна давала шматмільённыя хабары ўзбекскаму рэжыму Карымава ў абмен на доступ да масавага тэлефоннага рынку Узбекістана. Таксама ў віну кампаніі ставяць неабмежаваны доступ, прадастаўлены ўрадам Азербайджана, Беларусі, Грузіі, Казахстана, Таджыкістана і Узбекістана да прыватных тэлефонаў і інтэрнэт-пошты. Гэтыя ўрады выкарыстоўваюць магчымасці TeliaSonora для пераследу сваіх палітычных сапернікаў.
Еўрапейскі радыёвяшчальны саюз (EBU), які кантралюе песенныя конкурсы Еўрабачання, прадаставіў TeliaSonora галоўны кантракт конкурсу ў 2013 годзе. Ён таксама даў права TeliaSonora субсідаваць і леташні конкурс у Баку.
Фота — ria.ru
