У рымскім метро цягнік заціснуў беларуску дзвярыма і працягнуў па платформе

43-гадовая беларуска захрасла ў дзвярах цягніка на перасадачнай станцыі "Тэрміні" ў рымскім метро. Прадугледжаная на гэты выпадак аварыйная тармазная сістэма не спрацавала.

Гэта здарылася 11 ліпеня. Паліцыя аднавіла карціну таго, што адбылося. Беларуска спрабавала паспець ускочыць у апошні вагон цягніка, але дзверы зачыніліся. Усярэдзіне вагона апынулася рука жанчыны з торбамі. Цягнік крануўся і пацягнуў беларуску за сабой.

Толькі на наступнай станцыі машыніст звярнуў увагу на агні сігналізацыі і выйшаў з кабіны, каб паглядзець, што здарылася. Шакаваныя пасажыры паказалі яму пластыкавыя пакеты з абарванымі ручкамі. Па іх словах, у вагоне працавала сігналізацыя, але цягнік чамусьці не спыніўся.

"Звычайна, калі чалавек захрасае ў дзвярах, спрацоўвае аварыйная сістэма тармажэння, і цягнік спыняецца аўтаматычна. Але ў гэты раз такога не адбылося, сігналізацыя не суправаджалася тармажэннем. Таму я спыніўся толькі на наступнай станцыі, каб паглядзець, што здарылася", — распавёў паліцыі машыніст.

Жанчына была тэрмінова дастаўлена ў бальніцу. У яе некалькі пераломаў па ўсім целе. Але небяспекі для жыцця няма, паведамляе La Repubblica.