У РБ не можа быць вялікай пенсіі? Павышэнне не зробіць пенсіянераў багацейшымі
![ФСАН складана знаходзіць грошы для цяперашніх пенсіянераў. Далей будзе горш / Еўрарадыё](/sites/default/files/styles/main_image_watermark_/public/2023-08/pensiya_2.jpg.webp?itok=YCKP52aO)
ФСАН складана знаходзіць грошы для цяперашніх пенсіянераў. Далей будзе горш / Еўрарадыё
З верасня ў Беларусі на 5% падымуць усе віды працоўных пенсій, то-бок па ўзросце, за выслугу гадоў, па інваліднасці, з нагоды страты карміцеля. Да гэтага іх падымалі ў траўні, таксама на 5%. Невялікія павышэнні адбываюцца некалькі разоў на год і дапамагаюць падтрымліваць рэальныя пенсіі прыкладна на адным узроўні.
Паводле папярэдняй ацэнкі Мінпрацы, у сярэднім пенсіі з верасня складуць 737 рублёў. З гэтымі грашыма беларускія пенсіянеры відавочна не змогуць прабавіць старасць у падарожжах хаця б па Беларусі.
Еўрарадыё даведалася, чаму так адбываецца.
Чаму пенсіі павышаюцца, але застаюцца невялікімі?
Пенсіі пералічваюцца некалькі разоў на год, бо нават нізкая інфляцыя азначае, што паступова за тую ж суму можна купіць усё менш. Напрыклад, у траўні пенсіі выраслі на 5% у дачыненні да красавіка, але ў чэрвені ўжо аказаліся на 0,3% ніжэйшыя, чым у траўні. І так з месяца ў месяц пенсіі патроху страчваюць сваю пакупніцкую здольнасць.
З вераснёўскім павышэннем будзе гэтаксама: пенсіянеры могуць чакаць, што спачатку пенсіі ў рэальным выражэнні будуць расці, лічыць старшы навуковы супрацоўнік BEROC Анастасія Лузгіна.
— Безумоўна, калі пенсіі павышаюцца ў намінальным выражэнні, то яны будуць павялічаныя і ў рэальным выражэнні. Адпаведна, калі доўга не павышаць іх, то праз інфляцыю, нізкая яна ці высокая, яны ўсё роўна паволі будуць зніжацца ў рэальным выражэнні. Таму перыядычна дзяржава пералічвае пенсіі.
![В Беларуси не может быть большой пенсии? Повышение не сделает пенсионеров богаче](/sites/default/files/styles/default_image_paragraph_watermark/public/paragraphs/image/%D0%B4%D0%B5%D1%8C%D0%BD%D0%B3%D0%B8.jpg.webp?itok=QcUnOH98)
Пакуль выплаты ідуць толькі з ФСАН, пенсіі ў Беларусі проста не могуць стаць высокімі. У ФСАН няма запасаў, а цяперашнія пенсіі забяспечваюцца ўнёскамі цяперашніх работнікаў. Людзі старэюць і з'язджаюць, таму адлічэнняў маладых проста не хапае на старэйшае пакаленне. А магчымасці эфектыўна збіраць на пенсіі самастойна ў Беларусі фактычна няма.
З 1 кастрычніка 2022 года з'явілася праграма, паводле якой беларусы могуць дадаткова адлічваць частку заробку на пенсіі. Дзяржава нават паабяцала дадаваць грошай тым, хто скарыстаецца гэтай праграмай.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.