У Расіі знайшлі парэшткі беларуса, які з'ехаў на заробкі ў 2013-м

У Расіі знайшлі парэшткі беларуса 1979 года нараджэння. У 2013-м мужчына з'ехаў на заробкі ў Ленінградскую вобласць і знік, піша прэс-служба Дзяржкамітэта судэкспертыз Беларусі.

Калі мужчына перастаў выходзіць на сувязь, маці падала заяву ў міліцыю. У Беларусі пачалі крымінальную справу па факце знікнення. У жанчыны ўзялі біялагічныя матэрыялы для магчымага параўнання.

Знайсці зніклага беларуса не змаглі, папярэдняе расследаванне прыпынілі. Але праз нейкі час у лясах Ленінградскай вобласці знайшлі парэшткі чалавека. 

Чашніцкія следчыя прызначылі судовую генетычную экспертызу. Яна паказала, што імавернасць сваяцтва складае 99,9%.