У Расіі глыба лёду ўпала на чаргу ў ваенкамат — ёсць загінулы і пацярпелыя

Малады мужчына загінуў пасля падзення глыбы лёду на чаргу, якая стаяла ў ваенкамат у падмаскоўных Люберцах. Інцыдэнт адбыўся напярэдадні, але пра смерць мужчыны стала вядома сёння. Ён памёр каля 5 раніцы ў рэанімацыі.

Удар прыйшоўся на галаву. Але ён быў такой сілы, што ў мужчыны зламаўся хрыбетнік у раёне паясніцы, піша рэсурс shot. Акрамя таго, у яго адбыўся разрыў печані, здарыўся ўнутраны крывацёк. Таксама былі зламаныя рэбры і пашкоджанае лёгкае. У чарзе ён стаяў, каб стаць на ўлік па месцы прапіскі. Яму было 34 гады. У мужчыны засталося трое дзяцей.

У бальніцу пасля гэтага інцыдэнту ўчора забралі яшчэ жанчыну — у яе траўма галавы. Лекары ацэньваюць яе стан як сярэдняй цяжкасці. Яшчэ двое пацярпелых ад шпіталізацыі адмовіліся.