У Польшчы ў грузавіках з кансервамі знайшлі кантрабандныя цыгарэты з РБ
Кантрабандныя цыгарэты / Straż Graniczna
Польскія памежнікі выявілі 1,2 млн пачкаў цыгарэт з беларускімі акцызнымі маркамі ў грузавіках, якія перавозілі элементы аконных канструкцый і банкі з кансервамі. Машыны на польскіх нумарах спынілі для праверкі ў Падляскім ваяводстве. Адну з фур адпраўлялі на рэнтген. У другой цыгарэты знайшлі пры вонкавым аглядзе.
Агульны кошт цыгарэт ацэньваецца ў 18 млн злотых. Супраць кіроўцаў — гэта грамадзяне Польшчы — распачатыя крымінальныя справы. Іх арыштавалі. За такую буйную кантрабанду ім пагражае пазбаўленне волі на тэрмін да 10 гадоў, адзначылі ў пагранслужбе Польшчы.
