У Мінску заўважна вырас кошт жылля для асоб з жыллёвай патрэбай
Квадратны метр падаражэў адразу на 400 рублёў / ілюстрацыйнае фота realt.by
У Мінску рэзка вырас кошт квадратнага метра жылля для чаргавікоў, якія разлічваюць пабудаваць жыллё ў сталіцы з дзяржпадтрымкай. Калі ў канцы 2022-га цана квадрата была 1 800-1 900 рублёў, то ў пачатку 2023-га — ужо 2 200-2 300 рублёў. Пра гэта піша агенцтва "Минск-Новости". У камітэце будаўніцтва і інвестыцый Мінгарвыканкама кажуць, што такі рост цэнаў абгрунтаваны.
У мінулым годзе рэзка вырас кошт будматэрыялаў, "таму некаторыя аб'екты ў 2022-м дабудоўвалі нават са стратамі для заказчыкаў і падрадчыкаў", расказала журналістам старшыня камітэта Ірына Гонтарава. З новага года кошт квадратнага метра жылля пералічылі з улікам актуальных цэн на будматэрыялы. Адсюль і атрымалася такая вялікая розніца. Пры гэтым рэнтабельнасць забудоўшчыка пры ўзвядзенні дамоў для асоб у патрэбе па-ранейшаму не перавышае 5 %, кажуць у Мінгарвыканкаме.
Там таксама сцвярджаюць, што ў рэгіёнах кошт квадратнага метра жылля для чаргавікоў не ніжэйшы, чым у Мінску.
