У Мінску адкрылі мемарыяльную дошку Валянціну Бялькевічу (фотарэпартаж)
Бацька Бялькевіча: Калі б “Дынама” дапамагло, я б не звяртаўся ў іншыя клубы
За тыдзень да адкрыцця мемарыяльнай дошкі здарылася не самая прыемная для ФК “Дынама-Мінск” сітуацыя. Бацька Валянціна Бялькевіча заявіў журналістам, што яму бракуе грошай для аплаты ўсіх прац (каля 70 мільёнаў), а кіраўніцтва мінскага “Дынама”, за якое пачынаў гуляць Валянцін Бялькевіч, не дапамагае фінансава. Нягледзячы на абяцанні. Грошы знаходзяцца літаральна за некалькі дзён. Але цымус у тым, што дае іх… кіраўніцтва БАТЭ на чале з Анатолем Капскім. Таго самага БАТЭ, якое ўжо 15 гадоў з’яўляецца асноўным і самым непрымірымым сапернікам “Дынама”.
Валянцін Бялькевіч — беларускі футбаліст і футбольны трэнэр. У 1992—2005 гадах правёў 56 гульняў за нацыянальную зборную Беларусі. Найлепшы футбаліст Беларусі (1995). Уваходзіць у Клуб Сяргея Алейнікава — спіс беларускіх футбалістаў, якія згулялі 500 і болей афіцыйных матчаў, а таксама ў Клуб беларускіх бамбардзіраў для футбалістаў, якія забілі 100 і болей галоў на найвышэйшым узроўні.
Пайшоў з жыцця 1 жніўня 2014 года, ва ўзросце 41 года. Прычынай смерці называюць сардэчны прыступ.
