У Латвіі заявілі, што пагроза з боку ПВК "Вагнер" з Беларусі змяншаецца

У Латвіі заявілі, што пагроза з боку ПВК "Вагнер" з Беларусі змяншаецца. Такое меркаванне выказаў дырэктар Цэнтра перадавога вопыту NATO ў галіне стратэгічных камунікацый Яніс Сартс. Ён перакананы, што сіла вагнераўцаў ужо не тая, што два месяцы таму, падчас "паходу на Маскву". А цяпер яны засталіся і без кіраўніцтва. Таму пакуль складана прагназаваць, ці будуць нейкія дзеянні за іх пагрозамі адпомсціць за смерць Яўгена Прыгожына.

"Тым не менш прыкметна, што крамлёўская эліта занепакоеная магчымымі зваротнымі хадамі "Вагнера", — цытуе словы эксперта delfi.lv. — Ёсць спекуляцыі аб тым, што ў "Вагнера" дастаткова прыхільнікаў і ва ўладных структурах, акрамя таго, некаторыя з іх звольненыя з пасад. Цяпер будзе трывожны перыяд нявызначанасці, якая расхіствае асновы ўлады ў Крамлі, а таксама ідзе на карысць украінцам у іх барацьбе з Расіяй".

Што да вагнераўцаў у Беларусі, Сартс звяртае ўвагу, што найміты ўсё робяць за грошы: калі не плацяць, то нічога і не робяць. Аднак ён не думае, што ціск нелегальнай міграцыі на мяжы з РБ зменшыцца, бо арганізуецца не ПВК "Вагнер". Больш таго, эксперт прагназуе яго ўзмацненне. "Мы можам чакаць розных пагрозлівых заяў, але рэальнай ваеннай пагрозы, верагодна, не было і не будзе ў бліжэйшы час", — кажа ён.

Яніс Сартс лічыць "з верагоднасцю 99%", што катастрофа самалёта, у якім ляцеў Яўген Прыгожын, з'яўляецца пакараннем Крамля за чэрвеньскую спробу дзяржперавароту.