Вы тут

У Лагойскім раёне COVID-19 у кіроўцы школьнага аўтобуса

Лагазінская сярэдняя школа / kalachi.schools.by

Пасля трох тыдняў вясновых канікул беларускія школьнікі зноў селі за парты. У Мінадукацыі не ўбачылі прычын цэнтралізавана закрываць школы на каранцін. А Аляксандр Лукашэнка прывёў яшчэ адзін важкі довад за вяртанне дзяцей у класы: "Мы ж на вёсцы дзяцей бясплатна абедамі кормім. У нас жа ўсе сем'і не такія багатыя, каб нармальна накарміць дзіця нават у абед".

Дзеці пераносяць COVID-19 бессімптомна. А вось дарослыя, якія могуць ад іх заразіцца, падпадаюць пад сур'ёзную небяспеку. І вось прыклад: каранавірус пацвердзіўся ў кіроўцы школьнага аўтобуса Калачоўскай сярэдняй школы ў Лагойскім раёне.

— 16 траўня я павёз дзяцей на кансультацыю ў Лагойск, а 19-га ў мяне ўжо паднялася тэмпература. У суботу [23 траўня. — Еўрарадыё] яшчэ раз адвёз дзяцей з вёскі Лагазы. Потым звярнуўся да доктара, мне зрабілі здымак лёгкіх, аказалася — запаленне. Сказалі, што калі тэмпература будзе павышацца, то выклікаць доктара, — расказвае Станіслаў Барткевіч. — Крыху пазней ў мяне з'явілася высокая тэмпература — 39,2. Спрабаваў збіваць, але нічога не дапамагала. А ўжо ў пятніцу мне тэлефануюць і паведамляюць, што пацвердзіўся тэст на каранавірус. Ляжу ў бальніцы, самаадчуванне цяпер нармальнае, але прапаў апетыт.

 

Кіроўца кажа, што перад кожным выездам апрацоўваў аўтобус дэзынфікавальнымі сродкамі. Не дапамагло.

— Заразіўся я, хутчэй за ўсё, ад школьнікаў з Лагазы, калі іх перавозіў: у Лагазе цяпер вірус. Калі быў на прыёме ў доктара, то жанчыны расказвалі, што там уся вёска заражаная, — працягвае Станіслаў Казіміравіч.

 

Мы дазваніліся ў Гайненскі сельскі выканкам, да якога адносіцца вёска Лагаза. Па словах старшыні Андрэя Свібовіча, сітуацыя папраўдзе напружаная.

— У Гайне ў нас сапраўды ачаг. Каранавірус пацверджаны ў пяці чалавек, 15 чалавек знаходзяцца на самаізаляцыі. Плюс Лагаза — тое самае. Мы самі сядзім як на іголках, — расказвае Свібовіч. — Чаму так атрымалася? Наш інвестар — Мінскі трактарны завод. Бухгалтэрыя пастаянна ездзіла на трактарны завод, а там закрывалі нават цэлыя аддзелы на дэзынфекцыю, і таму, напэўна, нешта прывезлі і сюды. Кіраўнік наш, два аграномы, майстар лесу з Краснасельскага лясніцтва, кіроўца аўтобуса — усе яны ляжаць у бальніцы. Механізатара адпраўляюць на самаізаляцыю…

Мінскі трактарны завод цяпер працуе — днямі на прадпрыемстве пабываў Аляксандр Лукашэнка.

Па статыстыцы, на 1 чэрвеня ў Беларусі выяўлена 43 403 выпадкі каранавіруснай інфекцыі. Калі верыць Мінздароўя, памерла 140 носьбітаў COVID-19.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.