У Казахстане заявілі пра спробы Беларусі і Расіі абыйсці санкцыі
У Казахстане заявілі пра спробы Беларусі і Расіі абыйсці санкцыі. Дэпутат ніжняй палаты парламента Максат Раманкулаў прапанаваў тэрмінова распрацаваць меры рэгулявання міжнародных аўтатранспартных перавозак. Паводле яго слоў, з-за санкцый шэраг кампаній з РБ і РФ пераносяць бізнес у Казахстан, і ўзнікаюць праблемы.
"Расійскія і беларускія кампаніі рэгіструюцца ў Казахстане, атрымліваюць казахстанскія нумары на вялікагрузы, выбіраюць бланкі дазволаў... і бесперашкодна заязджаюць у Еўропу і выязджаюць адтуль пад сцягам Казахстана", — гаварыў ён.
Такім чынам кампаніі з Беларусі і Расіі "ствараюць канкурэнцыю і выціскаюць з рынку казахстанскія прадпрыемствы, а значыць зніжаюць даходы мясцовых кампаній і насельніцтва", паколькі на грузавіках працуюць беларусы і расіяне.
Можна не сумнявацца, што ўлады Казахстана прымуць меры "для абароны нацыянальных эканамічных інтарэсаў".
Як вядома, з красавіка краіны Еўрасаюза забаранілі грузаперавозчыкам на зарэгістраваных у Беларусі і Расіі аўтамабілях перавозіць грузы па сваёй тэрыторыі (у тым ліку і транзітам). Адразу ж з'явілася інфармацыя, што санкцыі будуць абыходзіцца з выкарыстаннем Казахстана. Але ўлады гэтай краіны тады ж заяўлялі, што не будуць дапамагаць, бо не хочуць, каб да іх краіны "ужываліся другасныя санкцыі ЗША і ЕС".
