У Грузіі на сустрэчу з новым мэрам прыйшлі толькі мужчыны. Жанчыны гатавалі абед

Новаабраны мэр Марняулі Цімур Абасаў учора правёў першую сустрэчу з насельніцтвам. На мерапрыемстве, якое прайшло ў цэнтры вёскі Качагі, абмяркоўвалася пытанне водазабеспячэння паселішча, але туды прыйшлі толькі мужчыны.

"Жанчыны зараз гатуюць, што ім тут рабіць?"

"У нас менталітэт такі — жанчынам у цэнтры вёскі рабіць няма чаго, і наогул такія пытанні вырашаюцца без жанчын";

"Жанчыны ў цэнтр вёскі не ходзяць. Гэта наша своеасаблівая культура".

Такія адказы атрымалі журналісты радыё "Марняулі", пацікавіўшыся прычынай адсутнасці на сустрэчы з мэрам жанчын.

Падыход мужчын вёскі Качагі да гендарнага пытання апынуўся прымальным для новага марняульскага мэра: "Напэўна, апоўдні жанчынам сапраўды трэба рыхтаваць абед для сваіх мужоў".

На сустрэчы, у якой удзельнічалі толькі мужчыны, разглядалася пытанне забеспячэння паселішча пітной вадой.

Пазней, у інтэрв'ю грузінскаму інтэрнэт-выданню Нетгазеці, Абасаў сказаў:

"Там былі некалькі мужчын і жанчыны таксама сядзелі непадалёку".

Аднак, на кадрах сустрэчы іх не відаць.

На мерапрыемства, якое прайшло, ужо адрэагаваў амбудсмэн Грузіі, які заклікаў мэра Марняулі ўстрымлівацца ў будучым ад сэксісцкіх выказванняў і працаваць у напрамку гендарнага раўнапраўя.

"Абуральная падтрымка практыкі парушэння правоў чалавека па гендарнай прыкмеце мэрам, які пры гэтым узяў абавязацельства садзейнічаць усталяванню раўнапраўя", — падкрэсліваецца ў заяве амбудсмэна.

Па словах амбудсмэна, удзел жанчын у грамадскім і палітычным жыцці застаецца адной з галоўных праблем краіны. "Падобнае стаўленне да гэтага пытання службовай асобы стварае пагрозу таго, што ў будучыні жанчыны будуць падвяргацца яшчэ большай дыскрымінацыі толькі па гендарнай прыкмеце", — гаворыцца ў заяве амбудсмэна.

У 2017 годзе па індэксе гендарнага нераўнапраўя Грузія па паказчыку ўдзелу жанчын у палітычным жыцці краіны заняла 94 месца сярод 144 дзяржаў.

Марняульскі муніцыпалітэт знаходзіцца ў рэгіёне Квема Картлі. 83 працэнты насельніцтва Марняулі — этнічныя азербайджанцы, якія з'яўляюцца грамадзянамі Грузіі.