У Беларусі рэгуляваць цэны на сацыяльна значныя тавары будзе Мінгандлю
Дагэтуль гэтым займалася Міністэрства эканомікі.
Міністэрства гандлю Беларусі будзе рэгуляваць цэны на сацыяльна значныя тавары. Раней гэтую функцыю выконвала Міністэрства эканомікі. Інфармацыя пра гэта ўтрымліваецца ў пастанове ўраду ад 4 лютага.
Як паведамляе "Интерфакс-Запад", Мінгандлю будзе рэгуляваць цэны на хлеб жытні і жытнёва-пшанічны, мяса (ялавічына, свініна), мяса курэй і куранят-бройлераў, яйкі курыныя, малако каровіна пастэрызаванае і кефір, смятану, тварог, сухія сумесі і кашы для дзіцячага харчавання, разнастайныя кансервы і сокі для дзіцячага харчавання.
БЕЛТА дадае, што Мінгандлю будзе адказваць і за такія сацыяльна значныя тавары, цэны на якія рэгулююцца не больш за 90 дзён на працягу года. Сярод іх — свежая рыба (сямейства карпавых), свежамарожаная рыба, сметанковае масла, пшанічная мука, сланечнікавы і рапсавы алей, цукар-пясок, харчовая павараная соль.
Як стала вядома. з 12 лютага Міністэрства аховы здароўя будзе ўзгадняць з Мінгандлем (раней — з Мінэканомікі) тарыфы на платныя медычныя паслугі (у тым ліку і стаматалагічныя і дыягнастычныя).
Фота: sb.by