У Беларусі да трох гадоў калоніі прыгаварылі адваката, які абараняў Бабарыку і Знака
Адвакат Дзмітрый Лаеўскі быў узяты пад варту прама ў зале суда / Свабода
Мінскі гарадскі суд 9 верасня вынес прыгавор адвакату Дзмітрыю Лаеўскаму — тры гады пазбаўлення волі. Падставай для абвінавачання, па якім вынесены прыгавор, сталі інтэрв'ю адваката розным незалежным беларускім СМІ.
Мужчыну ўзялі пад варту прама ў зале суда. Пра гэта паведаміў сябар і былы калега адваката Яўген Пільчанка ў каментары "Вясне".
Лаеўскага абвінавацілі па арт. 361-4 КК (садзейнічанне экстрэмісцкай дзейнасці) і арт. 369-1 КК (дыскрэдытацыя Рэспублікі Беларусь).
У 2020-2021 гадах Дзмітрый Лаеўскі абараняў палітыка Віктара Бабарыку і адваката Максіма Знака. Адразу пасля вынясення прыгавору Бабарыку Лаеўскага выключылі з калегіі адвакатаў — падставай стаў яго выступ у судовых дэбатах па гэтай справе.
Раней, у 2011-2012 гадах, Лаеўскі выступаў абаронцам праваабаронцы Алеся Бяляцкага. Пасля гэтай справы пад ціскам ён быў вымушаны на некалькі гадоў пакінуць адвакацкую дзейнасць.
